新接觸

週五下班,跟寶寶同Sam到一間上樓咖啡店晚飯.席間大家決定去看電影,起初我打算用手機上網去查詢播映時間.結果load極load唔完,個interface又好奇怪,於是靈機一觸,就試下用部i-touch上網.不得了.感受一流.好似發現新大陸一樣.突然覺得,買新手機,i-phone一定係必然之選.唔止型,仲真係好玩好用先抵死.之後食甜品就同寶寶圍住部i-touch上facebook睇佢上個禮拜旅行既相.勁!

最好的楊千嬅

一向覺得楊千嬅是走運.一路上有林夕跟人山人海.給她的曲跟詞,唱得再一般,依然入心入肺.之前沒有看過她任何一個演唱會,根本不是一個千嬅迷.今一次神推鬼撞跟朋友去看,感覺她應該是上了身,又或者林建岳拜過白龍王有神庇佑,千嬅係唱得意外的好,有幾下感覺仲唱得好過碟.很多舊歌,最鍾意應該同好多人一樣係"數你".朋友間講開,先發覺有些歌已是我初中回憶.千嬅今次既表演的確亮眼,刮目相看.抵睇.你好野.

好過C+的C+偵探

一向不喜歡看鬼片,俾錢,俾人嚇,唔化算.我膽唔大,返到屋企望鏡會以為有鬼,無為.彭氏兄弟既戲一向都無勇氣睇,除左成套青春片格局既"見鬼十一"."C+偵探"睇之前同事已經提醒過係一套不節不扣既鬼片,睇既時候無想像中咁恐怖,但都係好緊張.拍得緊湊,死人配樂好驚,驚過個畫面.讚.

色戒

全片最記憶猶新唔係梁朝偉同湯唯既性愛十八式.而係錢家樂被殺一幕.年輕人初次殺人既幼稚同荒唐,真係睇到個心都跳埋出黎.無覺得套戲特別好睇,有少少似斷背山,全世界都俾一百分,自己就係投入唔到.

舊去新來

酒醉.搭的士回家.瞓足全程.狼狽落車,行多兩步先發現隻耳插住個耳筒,部ipod就已經唔見左.唔明點解一大部ipod竟然可以跌左.神奇.朋友話ipod touch出左,價錢同當年ipod video面世時差唔多,所以就走左去買.用左個幾鐘入返二千幾首歌入去.16GB容量,唔見左13GB,地方唔係好見洗.用左一日,暫時感覺ok.除左間唔中個screen會sense唔到我隻手指公.下一步係要幫二千幾首歌搵返佢地個封套...十級難,但為左靚,值得.

停住空氣

街上一陣風都沒有.四周都好似多了一層霧.空氣污染指數高企,鼻敏感好辛苦.

家中閒來於Youtube發現一首男聲版Umbrella,分享一下: http://www.youtube.com/watch?v=5paQ9BwFAgI

人山人海

環保的課題談的久,貫徹實行卻從來沒有.事情是在發生的,氣候反常的嚴重性,無可選擇地每個人都感受得到.勸導世人要珍惜自己棲息地的,最近有綠色和平夥拍人山人海.演唱會中有很多地球受污染的數據跟資料,十居其九都是舊聞,普羅大眾對這些熟口熟面的警號都有一定認知,所以實不相瞞我是覺得個show有點悶的.明哥始終係主角,縱然黃家強亦成功踩場.at17的藍天與白雲令人耳目一新,最型我倒會揀麥田守望者.短期內都唔會去伊館睇show,d位的確好細,坐得的確好辛苦...琴晚我無開冷氣瞓,唔知幫唔幫到地球先生.

傘

Rihanna的Umbrella是近來心水作,閒來網上找到Mandy Moore的翻唱版本.簡單的編曲,別種情懷,一樣精彩.

http://www.youtube.com/watch?v=Q7yqzVNXEVQ

阿森一族

套戲同電視一樣咁好笑.由開場笑到完場出字幕,仲想點!

嚇死蔡依林

帕布突然翻轉頭,天文台說是三年來第一次八號風球.三點左右,匆忙離開公司.以為地鐵信得過,去到中環站先知錯晒.全港市民一齊收工,場面之偉大,實非現今CG科技可比美.月台上唔到;有車又上唔到;上左車,到站又落唔到.結果漂流到銅鑼灣落地生根,開枝散葉.

中環站人山人海之情景,完全落唔到荃灣線.連在牆既蔡依林都嚇一跳.

有車上唔到 ...

... 上左車,又落唔到.

有增無減的人潮.慘過行花市.

變型金剛

作為七十年代尾,香港經濟起飛中出生的男生,超合金絕對係童年回憶的重要課題.為左俾無限咁多個理由小朋友去扭計洗阿媽啲錢,當年超合金的設計實在層出不窮.飛機可以變機械人(超時空要塞),打火機又可以變機械人(黃金戰士);六架機械人可以合體做一架(六神合體);五隻老虎又得(百獸王);十五架都無問題(機甲艦隊).變型金剛我好似未擁有過,反而我表哥就有.年初於戲院見到Transformer張海報時,第一個反應係「得唔得架?」.睇完套戲先發現原來係非常十分之咁得.不得不驚嘆CG科技之發達.零瑕疵地實現左好多人既童年夢想.將幻想化成現實,這是電影最原始的吸引力.史匹堡功德無量.

手

小手術之後,一直對個傷口都好小心.於運動不能不做之情況下,去gym都只會做二頭跟三頭(這個禮拜已經進步左,做埋個膞).希望有一日隻手可以好fit,但係個身好鬆.個對比幾有趣.

KERORO

睇左"KERORO軍曹大電影2:決戰水著兵團".套戲無想像中無聊,有少少溫情,再加兩毫子教育意義.亦因此令到套戲好悶.純粹為兒童而設的卡通電影,有些少似睇叮噹(我年代的人係叫叮噹,唔係多拉A夢).

病癒看人生

有些事,要發生,毫無徵兆就會發生.明天係點,無人知.計劃人生之餘,今天過得開心更加重要.要學Bobo個部落格,「活在當下」.唔係咩大道理,但一病之後更加明白.

品牌經理

公司有個蚊型pitch.由我主理.好開心.終於有少少似返個品牌經理.

兩杯

收工跟朋友在茶餐廳打發左一陣,連環兩杯凍啡以後,身體突然非常之咁唔舒服.反晒胃.仲辛苦過飲酒飲大左.返到屋企眼光光瞓唔著.自己攞黎,好白痴.

婚宴第二回

好好一個結婚蛋糕,寄存在酒店,拿走時竟然只剩下半顆.在Ivan的威迫恐嚇下,酒店最終賠了一個一模一樣的蛋糕再加一個9人的免費下午茶給大姊.上星期,在一家法國餐廳,幾個朋友,再一次分享那三層高的結婚餅.吃不完是當然的了(其實只吃了最高層的一半).感覺是比之前那個更鬆更好吃.餅可以吃兩次,婚結一次就好.再祝新婚快樂 :)

十萬個重要

月初的時候,發現身體有一些毛病.求診未癒.再見醫生的時候,就被轉介到外科.為了安心,動了個小手術.之前除了探病,醫院我是一次沒去過,沒想到一進去就要在身上開兩刀.手術很快,而且由開力到傷口癒合其實一點都沒有痛.起初是沒打算跟家人或朋友說的,免他們擔心.結果入院以後還是跟媽及幾個友人說了.前天報告出來,慶幸沒有大礙.虛驚一場.又一次把吸煙的習慣戒掉.這一次完全是為了身體.健康真的是十萬個重要.我無晒野架啦,唔洗擔心.

雨中寶島

我不是常去旅行的人.總覺得去旅行要花的錢好多.這次到台灣都是沒有太多預謀的,先拿假期,興之所致,價錢又算合理,就到寶島去了.這幾天台灣都一直下雨,到那裡都要撐傘,好麻煩.如果沒有穎跟yellow,我大概就要在飯店呆三天了.這次到台灣,去了九份,到了基隆,泡了溫泉,唱了K.縱然天氣差,感覺還是新鮮的.記得上次穎到香港來,我只有跟他吃了一個晚飯,都沒有好好帶他去玩,實在非常慚愧.赤柱,淺水灣,南丫島,下次你來,我統統都帶你去.

霧中101: 好高,唔係好靚.裡頭跟ifc其實一樣.

九份: 感覺有些像赤柱,店舖都很有特色.吃了很多東西,最喜歡一個用薄餅包著花生跟雪糕的(名字記不起了),超讚!

基隆夜市: 在九份吃了太多,所以到雞籠(基隆原名,都幾好笑)夜市都沒有甚麼胃口.

給自己

時間可以証明一些,可以帶走一些.做了一些決定,將來會更好,更壞,其實都不知道.對跟錯不好分辨,但應做的,不應做的,自己最清楚.世上唯一騙不過的,就只有自己.這是我給自己的一個記錄,一個很純粹的記錄.

鄭秀文

1991年,鄭秀文推出第2張大碟"Holiday".那年她19歲,我12歲.2007年,她開了第6個紅館個唱"Show Mi",她35歲,我28.陪住我大的Sammi,這一次很賣力.應該是最賣力的一次.歌唱的只是還可以,但最吸引,最驚喜的是她台上的放.好似"take左野"的energy,是第一次感受到.Sammi是老了,但"Show Mi"應該是我最喜愛的鄭秀文演唱會,因為這一次她最投入.

十分 熱

十個熱滿分,今日會有四十個.

湯

工作再不如意,感情再多煩惱,回家都一定有瓶湯放在桌上等我.這瓶湯讓我就算每天只睡四小時皮膚都不算太差.煙酒再多都不至面容衰老.我是很喜歡我媽的.那種隨時候命年終無休的全天候關懷,除了媽,誰都付出不來.再寫下去,大概會很肉麻,但母親的確是要歌頌的.沒了那瓶湯,我係應該會比而家再樣衰好多.

壞習慣

三年多了,以為戒掉了的,結果還是戒不掉.好多事情,大概是本質問題,改不了.經驗可以讓人學聰明,但你是怎樣的人,結局多半會是一樣.我知有一天我是會不再抽煙的,直至我再找到二零零三年捌月三日那個理由.

咖喱牛腩飯

我是一個很悶的人.一個禮拜就吃了四次咖喱牛腩飯.

安樂飯

忙了一個星期,禮拜天還是要上班.十時多回到公司,九時左右下班.跟米去吃飯,才突然發現這一餐是這個禮拜裡,唯一一頓不是在公司吃的飯.好感動,連吃飯的速度都特意放慢下來.好安樂的飯呀!

遺失的美好

有的人說不清哪裡好
但就是誰都替代不了...

apr 14

sam結婚了.那天在註冊的地方,有好多對新人,但sam還是最美的.穿婚紗的,其實很容易就很俗氣.還是簡單的打扮有品味.之前的一個禮拜,因為工作的關係,都沒有好好的睡.那天我其實累個半死.但見到一個好朋友跟喜歡的人,許一個一生的約,那又的確是好讓人感動的事.祝我身邊的朋友,每個都找到自己的幸福.

一天啡

剪頭髮時,因為悶,髮型師也沒有大力促銷,不消半句鐘,我就得到了一頭啡髮.很久沒有染髮,久得再怎樣看都不順眼.不順眼到一個地部是晚上我乾脆就自己把它染回黑色...很浪費,我明白.短期內都不會有染髮的念頭.

芬梨道上

逛得太多中環,銅鑼灣.開季又無意欲買衫.結果今日同米上了山頂.上一次上山頂大概是年多前.約左人未夠鐘,悶到發慌,於是一個人坐然起行,話去就去(其實係無聊到極).今次兩個人去,影下相(扮遊客),食下野,又一日.呢類無預謀性既戶外活動,間唔鐘一,兩次,都幾ok.

春飯

一年過得實在快.不知不覺就喺呢間公司做左一年.以往績計,我算係一位不從一而終,水性楊花,淫蕩,濫交,流動性極高既員工.一年對我黎講已經係記錄.上一年既「春飯」依然歷歷在目,今年嗰壇又已經攪掂左.上年抽到UNY coupon,今年抽到SOGO,算係進步.下年唔知仲會唔會留喺呢間公司,但如果係既話,抽嗰份獎應該會再好d ... 可能係連卡佛.

我愛你,再見!

跑步整親腳.跛左成個禮拜.而家雖然好似無野,但係都未敢跑返.得到了一對新跑鞋,媽就急不及待的把我舊的運動鞋給掉了.我真係好喜歡舊的那雙鞋,但係佢又真係爛得好緊要.平時媽幫我掉東西,多數我都會發個圍.今次真係無計.愛有時真係唔夠.再見啦,鞋!

手

我的手不美,我清楚.瘦到見骨,又粗.但偏偏就當了一天的hand talent.我的手今天拍了三張照,足足更用了六句鐘.看上去很容易的事,原來都是辛苦錢(註:我是無收分毫,純粹義務性質.要收錢都應該唔會搵我).辛苦晒個retoucher.

msn出錯

下載左新既msn,一心走在時代既尖端.誰不知,新msn log-in唔到之餘,仲攪到我不停斷線.Un-install幾次,再下載幾次都於事無補.結果由時代既尖端一下子返番去第一代始初版msn.無晒emoticons,無profile相,連hotmail in-box update都無.好多野,新總不如舊,但係msn唔係.

28

28,感覺人生盛放.同朋友食左餐說話不多的飯.大概人太多,桌太大,談起來不方便.之後又是蒲,倒是沒有喝得很醉,比平常還要收斂.還算是安安靜靜的過了一天.其實對於慶祝,口是說沒所謂,但心還是想熱熱鬧鬧的.得二十幾歲,點解唔玩.28,努力工作,努力生活之餘,我都會努力玩.好努力添.

愛情萬歲

一早起身就見到sammi既全版廣告.愛情萬歲,我連msn個名都改埋.張相好似營光粉紅個封面.隻歌,上下一心,曲詞編唱都交行貨.演唱會我還係會睇,有時愛一個人真係可以好盲目.愛情萬歲!

過年

新年除左初二一家大細開個年,熱鬧左一下,基本上都係悶.上圖可見我家中全人(除左強表弟去左台灣避年).我自問都係一個"娘"人.新年係要著d紅野先高興.今年可能係去左一間大機構既關係,又或者個市真係好左,利是方面既收入都過得去.行左個花市,打牌輸左300,希望豬年會好啦.

地球先生死啦,就快

二月,最高二十四度.拜年應該可以著背心.

我會做好呢份工

今日之後工作又要再努力d *

殘

當你明明好精神,但係朋友問你係唔係睡不好;又或者十幾個鐘睡眠後,健康到暈,但係同事偏問你係唔係病,面色好差,你就知你有幾殘.

第二次好過第一次

對楊千嬅我是有偏見的.好似好多人咁,一向覺得她聲音冇特別,歌也唱得不好.幸運地佢又真係有好多好歌.剛聽她的新碟,我係聽到佢把聲就憎.之後聽聽下,先發現係有d野.林夕係偏心的."大傻"同"我的生存之道"既豁達固然人人受用."芬梨道上"既細緻反而越聽越窩心.一個林夕就咁又一次做就左一個楊千嬅.
---------------------------------------------
第一次看盛夏光年,感覺是失望的.可能是坐得太前,電影又有太多近鏡.看得有點累.期望很大,但故事也好像沒甚麼.星期六,跟一顆兒再看一片...可能是沒了期望,坐在全院最未的第三行,焦距對了,反而看得自在.沒有很努力去解讀電影的小節,沒有很感動,但淡淡的,不痛不癢的,看的還舒服.
---------------------------------------------
很太事,都是應該再給個機會的.

論嫁

話咁快,Tracy就嫁左啦.差d就因為演唱會門票攪錯日子去唔到飲.祝一對新人開開心心啦.同埋嫁個日既女仔,的確係靚d架wor.

談婚

Sam很快就要結婚了,星期天跟Mike陪了她到廣州走了一轉,才發覺結婚要安排的東西一點不少.打算一切從簡既Sam,要煩的都已經夠多.結婚只有攪同唔攪,原來係無小攪同大攪之分...(咁當然徐子淇嫁人同一般平民百姓係有好大唔同啦,但係你又要諗下有幾多人幫佢,你結婚有幾個姐妹幫你都要偷笑).Sam,唔好再客氣啦,你既人生大事,做朋友既一定幫到底.赴湯渡火,過關上大陸又算d咩.同埋唔該記住我要做花仔.

泰國

一年內去了兩次company trip.年頭去了東京,轉公司後,年未去了泰國.三天的時間是一點都不夠.本來以為回來會有一身朱古力色,但水卻只游了一次,還要那天是冷得發抖.在香港很少跟同事"蒲",去到泰國反而有大大個藉口.幾近半百人一齊去玩.勁.