溫柔

媽今天入院做檢查,要留醫一天.七時許,叔叔打了個電話到公司找我,提醒我要到醫院替媽辦手續,又說媽口是說不怕,但一定很緊張.他叫我不要跟媽說是他提我的,他知道媽會更開心若果我是自覺的記得.二十七年,第一次我發現叔叔的溫柔.

江湖再見

7點半收工,衝忙由太古城趕到旺角去看8點的"放逐".沒寄望的,一般不會失望.免費的更加唔會.今次都無.杜琪峰既戲睇得唔多,上一套係"黑社會2",無驚喜但又唔係難睇.今次反而真係型.最鍾意入面既幽默感.睇完同朋友講返套戲,原來訐紹雄個角色係代表殖民地政府...深到呢,不過有意思.比勁期待既"盛夏光年"睇得仲開心.

悶

頭髮剪完又留,留完又剪,剪完而家又悶,又想留.怕悶既人都係煩.

舊同窗

做左二十幾年人,總有幾個老朋友.媽媽從前講過,讀書時的朋友先係真正既朋友.出黎做野之後,世途險惡,利慾薰心,唔會再咁單純.好彩我仲未遭遇過壞朋友,更好彩就係同好幾個中學同學都仲保持到聯絡.我唔係會間中打俾舊朋友慰問兩句個d人.好彩你地都無放棄我.今次食飯仲約係舊底學校隔離大排檔,好抵食,十蚊仲有四罐汽水.

再見我的長假期

沒事為的長假期.有些東西弄清楚了.休息過,再上路.現在工作才是我的第一名.

guide for being stupid for dummy

history repeats itself, but you never learn. 要學聰明.

哈囉喂

上年買普通飛去海洋公園哈囉喂,咩都玩唔切.今年早左安排,用多百幾蚊買張至尊飛,玩晒d鬼屋都唔至,仲玩左好多機動遊戲.終於玩左跳樓機.好玩,不過好快.

澳門

好久沒去過澳門,上年因工作去了一天,也沒有去甚麼地方就走了.上個禮拜跟幾個朋友過大海,留了兩天,感覺是 ... 其實沒感覺哈哈.說到底,不過是朋友一塊兒找些別的做 ... 去了新開的永利,沒想像的大不了;反而俗氣的金莎裡頭還算有氣派 ... 無咩寫啦其實

病

請左半日病假.睇左醫生好左好多.原來唔係次次病都可以自己克服.要準時食藥,唔可以病住過個長週末(雖然其實又唔係有咩特別野做).

夏天完了

不經不覺,夏天就完左.秋涼天氣感覺到晒.有運既話可能仲會熱兩日,冇運既話就應該唔會再有得晒.個光頭,冇左朱力色皮膚,就好似宮廷裝襯涼鞋,錯晒.好時光總係唔夠長,夏天總係特別短.我其實係好愛夏天架.

CAMP

週末跟幾個朋友去了長沙宿營.呢樣活動又係中學畢業以後就無做過(又一個黃金十年).雖然天氣麻麻地,仲無啦啦轉涼,但係又幾開心.起碼有d唔同,起碼唔係銅鑼灣.同埋原來我無自己想像中咁憎燒野食.

羽毛球

中學以後,差唔多十年(無錯,無啦啦就畢左業十年)無打過羽毛球.突然同同事打返,其實都幾大運動量.每次打完件衫濕到好似水塘咁,都幾開心 ... 好似好健康.

阿叔

前幾日一個天真爛漫既細路叫左我一聲"叔叔早晨" ... 二十尾,未係叔叔掛(難為我仲要笑晒讚佢乖 ... 雖然佢確實係幾得意).

零分

作為一個男朋友,處理生日呢個環節上真係零分.自己都覺得流皮時就應該真係好流皮.如果流皮係為左有空間進步,我下年應該可以進十步.好彩你唔厭棄呢個零分男朋友.

結一個婚

可能係日子好,突然間身邊出現左兩單毫無先兆既婚事.以前覺得結婚同自己好遠,但係近來 lunch hour 同事間就係不停咁講娶老婆要幾錢,生仔又要有咩安排.原來我已經到左適婚年齡.拍片見到個4歲既細路.個樣好似我,數下手指,我生得出佢有餘.唔係話自己老,但係真係唔細.我唔相信婚姻,但我尊敬有承擔既人.一生一世唔係容易既事,願意試既都係勇敢既人.祝福我身邊所有勇字掛心口既好朋友.

生日

餐飯食左好耐.9點食到差唔多成點.為左呢個局,花左百二蚊買套校服(全線friend都已經燒晒d校服,包括我自己).好耐無玩過呢d dress up野啦.阿花,生日快樂.

拍野

忙了好一陣子.完成了一個還算大規模的campaign(其實又唔係真係好大,不過係我做過最大的).第一次拍電視廣告,完成品沒有很驚喜,但係睇到條片,又真係好開心.或者我對我個行業,口就話唔鍾意,個心其實都唔知幾喜歡.

沒話說的好天氣

三十二度的氣溫,加上兩陣微風,躺在沙灘,天氣是好的沒話說.水也又不會太溫不會涼.個天真係唔話得.

好大雨

昨天下班乘的士往銅鑼灣跟老婆晚膳,雨下得特別凶(仲狂行雷).在的士上,我係異常咁驚.水撥動作再快,雨還是擋了前面的視野.完全睇唔到路既情況,仆街司機仲要講電話.其實應該搭地鐵.

妻子

俾個錯既人攪左咁耐,終於見到老婆搵到戶好人家.呢個世界還是有好人的.好似老婆講,搵對象就好似夜冷鋪搵筍野.唔係無,不過難搵d,需要d時間同心機.你勁啦,咁都俾你搵到.

代表作

世界波

星期一去左跟shot.影左十二套胸圍.咁大個人都未見過咁多胸,咁多圍.影樓返工都幾爽,雖然柴灣係有少少遠(但係太古城都唔見得方便).

x-men

變種特攻3.好期待.但可能有太多新角色.講極都唔入肉.最鍾意既Jean終於死左(雖然佢都唔係未死過,而且你要知道佢係五級變種人).套戲叫The Last Stand,但個ending好明顯表示會有第四集.博士仲要返生添(唔知有幾多人miss左字幕後個兩分鐘片段).同埋Halle Berry真係唔洗咁多戲.無咩好睇.

端午節

端午節十點就起左身.食過粽,返落床,一起身又四點.懶到嘔.本來係想去健身房,結果俾親戚捉住打牌.輸二百.得閒休息下,無無聊聊又一日.

好唔得

兩個星期睇左兩套唔得既戲.第一套叫鬼魅山房(Silent Hill).完全唔知佢想點.睇完爆粗加割凳.故事唔合理都算,但係連驚嚇都做唔到.好耐無睇過咁衰既西片.陰陽路系列可能仲好d.

第二套叫達文西密碼(The Davinci Code).或者套戲個implication係好深遠.但係套戲拍得又真係差.感覺好似睇緊一集好長,好多對白,又拍得唔係咁好既CSI(唔知點解我總覺得套戲好電視).仲加埋o係黃埔UA睇,睇完戲要去睇脊醫.

希望Xmen好睇d啦.好期待!

雨過

風打唔成,三號波,雨都無兩滴.跟米吵了幾天架,很久沒有吵架,要吵幾天的架就更加少.手足無措了差不多一個星期.沒事了,反而想或者應該係時候計劃一下將來,一個我同佢一齊做既將來.可能係儲錢買樓去旅行,可能係結婚生仔攪退休.唔知,要傾.好多野都要傾,開個會先.

百合

回家撲面而來係一陣百合既氣味.咁多年叔叔對媽都一樣.生日好,母親節也好,都是一束粉紅色的百合.

是非地

我係一頭牛.我只係想做好自己.人家的嘴我管不了.也不會管.是非阻不了我到要去的地方.

頭好痛

夏天啦!

好天到咁都晒唔到太陽.好浪費.下個禮拜啦.

一點場

已經唔記得上一次睇戲睇一點係幾時.今日跟同事去睇以和為貴.感覺係好早.早到一起身就要沖涼換衫出街咁.有d類似的team building活動都幾好.食餐飯睇場戲,輕輕鬆鬆又一個下午.講返套戲,大家都覺得無第一集咁好睇.但無睇第一集既我,又覺得唔係咁差,起碼唔悶.睇下第三集又會死幾多人.

Training

阿姐返得黎遲.我都係趕唔切enrol training.以前對training冇咩感覺,去又得唔去又冇咩所為.但今次有d唔同.黎到新公司,工作上既目標係比以往清楚好多.突然有股勁要去做好自己,表現自己.每個機會都貪婪地唔放過.做左兩年野好似宜家突然醒左,終於知道為咩咁.

勁

阿粉 farewell, ecd 又黎, ceo 又黎.一個字 ... 勁.唱完k,我個心口瘀晒,仲有個鞋印,都係意料不及.

一個月

今天剛剛是到新公司後的一個月.亦是上班以後第二次十時前下班的一天.感覺是慢慢的回復以往的節奏.但回復並不夠.超越才是目標.我知道自己能夠做得到,這一次我就要統統做起來.

等

等.等.等.等.等...

競爭對手會報

我o係舊公司係做個無數咁多個competitive review.但係以前一直都只係堆晒人地d ad出黎就算.有一兩句似有非無既所謂insight就好似要俾個傑出員工獎自己咁.一直覺得做competitive係好無為既一件事.黎到新公司.新人事,新作風.先發現原來competitive可以係一件好實用,好現成既練習工具.認認真真去寫,由出左街既廣告,諗返人地個brief,原來可以幫到自己多d從唔同角度諗野.啟發思維.都係要多謝下我而家阿姐.多謝佢有要求.我一定會越寫越好.然後都真係要寫brief時,就可以有返d水準.

電台宣傳帶

做左大大話話兩年廣告(雖然第一年應該唔係好計),今日終於錄左第一條電台宣傳帶.d talent 真係好專業.30秒條script,錄兩take,唔洗5分鐘已經攪掂.阿客又復得快,不失為唔痛又有快感的第一次.(縱然由太古城去擴播道係有d遠,而book商台studio房又有d趕...阿商台三點九confirm我有房,四點要到,你估我樓上返工架) plus 無啦啦俾我呢個無聊人見到商台個職員生日索引.原來俞琤剛剛過左生日.恭喜晒.

剪頭髮

剪頭髮最討厭係要等.洗完頭,吹乾晒,醜到暈,仲要用兩三本雜誌,消磨三四十分鐘.唔肉酸就唔會去剪頭髮.剪得就唔好要人唔gel頭坐住等.我真係寧願你老老實實話我聽要遲幾多,我去行下再返黎.你估好恨睇你d雜誌.(我都知星期六去剪頭髮"賴"野架啦)

星期五

艱苦渡過一個禮拜,星期五應該是疲累到極點.但下班就回家,總會有些失落.之前放長假期的時候,沒有特別渴望要跟朋友逛.在家中閒著一天也沒所謂.但上班以後,週末時間,感覺是非到外面走不可.越累越要找些工作以外的去做.唱k好,看電影好,吃飯好,喝酒也好,不平衡中感受平衡.所以無論疲憊到邊一個程度,都總不能不蒲.

義

兩個人既事,永遠只有兩個人清楚.其他人,一知半解既意見,其實幫不上忙.
正如感情從來沒理由,撐朋友都一樣.你決定背後既原因我可以不管,因為只要係你既決定,你認為最適合的,做朋友既一定撐到底.出黎行既只係講單字一個"義".得閒記得睇"以和為貴".

睇唔開

開始發現除了工作以外,我是沒舍好寫的.依然是忙,這是不會變的.可能是客戶也算講道理,創意部門也很合作(我對終日改artwork首先表示深切抱歉).所以心情沒有以往的焦急及不耐煩.我希望現在的平靜是長大的成果,對工作看開,用平常心對待.但其實我又知道自己還未化的,只係好彩工作未算趕到仆街(談到工作,一兩句髒話少不免).升職加薪固然係工作既終極目標,但學識做好本份,唔受外在因素影響心情,或者對走更遠既路有幫助.不慌不忙先係大將.

題外話,真係要做返gym,好似瘦左好多.如果lunch抽到少少時間就正晒,雖然其實好難(可能仲難過早收工).

運動

結果電影沒有看,倒是上了健身房.運動的確是可以讓人快樂的.就算不是快樂,也總會令人振作抖擻.三個星期了,我終於再次感受到我的身體.夏天又到,又要晒太陽,又要游水,又要著背心,真係唔可以怠慢.工作穩定以後,希望會有多些機會睡眠 + 運動.

涼

復活節這幾天公眾假期,街上一片冷清.大概很多人都走到外地吧.溫度突然下降了很多,本以為不用再穿的外套,還是未能收到床底下.可能是這樣的一個氣氛,4天的假期都沒有甚麼高興的.一切標準的假期活動都做了.跟朋友家人吃飯,喝酒,購物,休息都做了,但腦內還是一片涼.努力投入,但效果一般.可能是跟米吵那個沒甚麼謂的架,可能是莫文蔚的歌太慘,可能是把十字架吊咀給掉了.今天要去看一齣喜劇.

抽獎運

春茗中抽獎拿了500元UNY現金券.宵夜以後打麻雀輸掉300.高興是高興,但不勞而獲的運還差了點.

不想

九點半左右便下了班,對比前數十天,實在超感動.清楚明白下星期的命運又會是夜.但未發生的,就先不要想.可以短視一點,專注做好每一天,其實真係唔洗諗咁遠.

討厭鼻敏感

撐

忙是預備了,但每天沒過十二時不能下班是始料未及.快三個星期了.除了上班首兩天比較閒,之後都是令人噴血的忙.被嚇怕是有一點,但後悔倒沒有.當初決定回來,現在再想也多餘.想的只有下班回家睡覺好,又或者,如果一天幸運,也許,縱然只是也許,我可以回到健身房,動一下.死撐,也得撐.多撐一天得一天.唔好當我流.

通街都係

又一個blog.四五年內,大大話話都開過五六個.msn有一個,geocities又有幾個.私生活放到通街都係,要儲返齊一套都唔易.

畢業以後,兩三年內,工大大話話都轉到第三份.或者都係時候買定離手,揀左條路,好好醜醜行落去.實幹得到的應該比迷信「人家的草比較綠」多.積極期待中.