生活記錄

Mar 25, 2009

回家

星期六是搬離娘家以後, 第一次回去吃飯. 剛向家人提議搬家的時候, 媽並沒有很讚成. 讓我自己拿主意的條件是每週回家吃飯一次. 一向工作社交都很忙, 有些時候的確連一週跟家人吃一個飯的基本事情都辦不到.

以前跟家人住, 很多時候都是躲在房間. 吃飯吃得快的我, 跟家人用餐, 三爬兩撥的不用十五分鐘就吃飽, 然後又回到房間裡聽歌上網. 現在電腦拿走了, 沒事幹的就拿起報紙在客廳一面看一面跟媽談起生活瑣事來. 原來家母上的公開大學課程, 是有教水電的. 她很自豪的跟我說, 她現在是連修理「拖板」都懂了. 我是從來很少打理家中電器的, 那天吃過飯以後, 反而是邊看電視邊清潔起家裡的風扇來.

也不是要說搬出去, 其實對大家都好的一種大逆不道說話. 但大概真的是夠久沒有好好跟家人相處過. 住在一起時, 一齊太理所當然. 費點勁去做, 感覺反而踏實. 我懂得電工的媽, 我要祟拜你一輩子.

Mar 22, 2009

三十

三十 = 新陳代謝放慢
你可以騙所有人, 你今年二十六歲. 但身體騙不了. 三十歲跟二十六歲的新陳代謝, 就像豐田鬥法拉利, 慢了一個圈. 酒量一直沒有很好, 但也沒想過會差到一個地步. 生日吃吃喝喝了三天. 就足足醉了三天, 吐了三天. 其中一晚更在切餅後, 放入口前就暈倒沙發上. 沉睡數小時, 最後由友人護送離場, 好不丟架.

三十 = 人生又一個新開始
今年生日比往年有更多朋友問「你有啥生日願望?」三十是一個階段的終結, 也是一個開始. 二十來歲, 勉強可以說自己是個大男孩, 三十歲說自己還小, 是會臉紅的. 步入三十, 沒有特別的願望或計劃, 最想的還不過是身體健康. 反而去年生日, 三十減一, 對三十以後的生活還有一份期待. 那時候決心搬家, 戒煙, 搵錢, 搵仔 (「仔」,意指朋友仔), 雖則沒有全線兌現, 但總算沒有全軍盡墨.

三十 = 好日子
我是一個相信每天都是情人節, 也不是要母親節才對媽好的人. 生日跟平常一樣, 沒啥大不了. 不過三十的一年, 還是想作個紀錄, 因為三十的一年發現身邊不缺朋友. 不是要晒幸福, 不過想以後百年歸老之時, 記得曾經有過這一段好日子. 給所有的朋友, 謝.

Feb 14, 2009

情人節

新年的時候, 一般都會回顧自己過去一年, 有否盡好本份, 有否實現之前一年定下的目標. 或許情人節, 除了是一個商人的騙局, 也可以是時候回顧自己過去一年, 有否當一個好情人, 有否好好處理上一段感情, 有否為下一段感情做好準備. 緣份雖然重要, 但也太容易成為不成正果的理由. 事業不如意, 你也會硬著頭皮撐下去; 感情不如意, 大概總可以積極面對. 情人節, 跟其他節日大概一樣, 普天同慶以外, 總有更重要的意義.

Feb 12, 2009

你咪理 ... Just Dance

流行曲的魔力在於就算你明明唔係好鍾意首歌, 只要你唔小心聽多兩次, 隻歌就會上左身咁跟住你, 無啦啦的去廁所會哼兩句, 搭車又哼兩句, 直至佢不再流行為止. 今一期怨鬼纏身的是 Lady GaGa 的 Just Dance. 從來覺得同 Lady GaGa 是不會發生感情的, 個名作狀, 已經憎左八成; 把聲無特色, 勉強一齊都唔會幸福. 但佢一直無放棄, 老細鍾意開住 iTune radio 做野, 熱爆的 Just Dance, 一日播足八次. 聽聽下, 唔小心開始識唱; 聽聽下, 唔小心覺得「其實隻歌都ok」; 聽聽下, 唔小心 download 左隻歌; 聽聽下, 唔小心今朝全程地鐵 on repeat 咁聽住. 有時侯愛係會同最無可能的對象發生的. 總之你咪理, Just Dance!

Jan 26, 2009

the curious case of life

過年少不免會賭. 麻雀好, 大細好, 魚蝦蟹好, 十三張好, 鬥地主都好 ... 技術再好, 都要講運. 跟不懂打牌的,初次落場總有斬獲的道理一樣, 成事在天不在人. 我不算一個迷信的人, 犯不犯太歲, 每年還得過. 但唔信還唔信, 見到同事檯面有本蘇民峰, 都會好奇的揭兩下. 姻緣部份尤其會細讀, 因為一來自己又步入「發情期」, 想拍拖; 二來拍唔拍得成拖, 實非一己之力能控制, 緣份從來比努力重要. 今年劈頭第一句就是「孤苦伶仃」. 屬羊的朋友, 不好意思, 雖則今年並無犯太歲, 但你同我一樣, 牛年戀愛運排第尾. 去年也不記得邊位玄學家說屬羊的鼠年遇到全是假桃花, 就一句說話, 咒語一般, 一年沒有忘記. 回顧過去三百六十五日, 的確無米粥煲到一地都係, 究竟是命, 定自己唔爭氣, 無從稽考.

緣份是一件很奇妙的事. 早一秒, 你未必會遇到他; 遲一秒, 你又可能已經把他錯過. 再愛, 時機不對就走不在一起. 六十歲的畢彼特, 跟如日中天卜卜脆的姬蒂白蘭芝不相襯; 女都生埋的人妻姬蒂白蘭芝同末路狂花的畢彼特可以攪, 不可以愛. 非得等到年紀配合的年頭, 兩人才可隨意的一起過生活. 看過奇幻逆緣之後, 有未看的朋友問, 其實套戲想講咩. 悟性低的我是攪不清的. 每一個場口, 每一句對白彷彿都字字珠璣. 但若果三隻小豬是要教小朋友起屋不可以賴皮, 那奇幻逆緣又好像拼不出一個大道理來. 電影中最刻意的, 卻又最有象徵意味的一個畫面, 我會說是出現過兩次的黎明與海. 或許生活永遠難盡如人意, 但若果能看得開, 上天其實每一日都在給你從新開始的機會. 電影中最欣賞是那段畢彼特給女兒的說話, 若果你不是過著想要的生活, 希望你有勇氣重新再活過.

命或者同茶餐廳常餐一樣係整定, 但幸福還是要爭取的.

Jan 12, 2009

又戒煙

新年總有新計劃. 成功實現的不多. 其中一個餒敗餒戰的心願是戒煙. 2009年過了12天. 第12天了, 還未有抽過一根煙. 以前曾經把這個壞習慣戒掉了一段很長的時間. 大概4年吧. 表面是為了健康, 實際是很無聊的為了一個人. 最無聊的是那個人根本都是抽煙的. 戒, 純粹是想自己成為一個更好的人; 一個好得讓他不能不要, 或後悔不要的人. 每次想起都覺得好好笑. 不過若果因為一個無聊的理由, 令自己更健康, 其實我又不介意. 2年前, 有一段時間工作很忙, 日接夜, 夜接日. 當體力跟心力都負荷不來, 順手拈來一個「壓力大」的理由, 就跟同事要了4年來第一根煙, 從此萬劫不復.

以過來人身份說, 切身經驗, 最能讓戒煙成功的材料是一個為時已晚的遺憾. 想健康一點, 這理由不夠好, 因為你還健康, 除非你覺得自己有可能已經生cancer,再唔戒就死路一條, 那「可能不再健康」的遺憾就成了你見到萬寶路, 心都不會癢的理由. 幾年前的我都一樣, 人家都不要你了, 才靈機一觸要做個更好的人. 對已逝去的執著及渴求, 人最大的力量其實說穿了是睇唔開, 唔服輸.

2009年戒煙沒有很踏實的一個理由, 只是對舊生活模式, 太多的失憶週末, 有些膩, 想變, 所以本人都不大看好自己可以撐多久. 希望身邊人都有比我高的能耐, 不為別人的去實現只屬於自己的計劃.

May 3, 2008

打下波

有朋友想打,自己又想打,坐言起行,book左個場,膽粗粗,唔怕醜,又拎返起個網球拍,重施故伎.學係學過,但都已經二十(甚至二十幾)年前既事.大學都有打,但不到五次.今次打雖然都係肉酸(六個波俾我打到得三個,有三個去左好遠既地方,搵唔返),不過已經沒有我想像中的一敗塗地.我深信,打多兩次就無問題.終於做返些少舉野以外既真運動.我分明就係個運動型男.哈!哈!

無聊人恩物

好愛facebook,因為facebook實在好無聊.當中的Parking War,可以話將無聊推到頂點.一個顏色配對遊戲,車跟車位的顏色一樣就泊得,錯就俾人抄牌,簡單過小學入學試問題.但唔知點解又會玩.仲要每日返工第一件事就係泊好架車先.唔須要用腦既玩意,正野.

Apr 25, 2008

單純的,沒有了

我不單純,也不要求單純,但我希望這件事依然存在.人越大越難單純的看事情.或者係諗多左.

Apr 21, 2008

男人三十

雖然未到,但越黎越貼身.唔係怕身體上既變化,唔係怕發福,又或者越黎越多眼紋,越黎越少頭髮(好在未發生).反而渴求一份成就感.工作上要有去到某一個職位,得到某一個收入,存到某一個積蓄,有自己一個地方,一群知心既朋友.很表面的,但很須要.

Oct 28, 2007

新接觸

週五下班,跟寶寶同Sam到一間上樓咖啡店晚飯.席間大家決定去看電影,起初我打算用手機上網去查詢播映時間.結果load極load唔完,個interface又好奇怪,於是靈機一觸,就試下用部i-touch上網.不得了.感受一流.好似發現新大陸一樣.突然覺得,買新手機,i-phone一定係必然之選.唔止型,仲真係好玩好用先抵死.之後食甜品就同寶寶圍住部i-touch上facebook睇佢上個禮拜旅行既相.勁!

Oct 17, 2007

最好的楊千嬅

一向覺得楊千嬅是走運.一路上有林夕跟人山人海.給她的曲跟詞,唱得再一般,依然入心入肺.之前沒有看過她任何一個演唱會,根本不是一個千嬅迷.今一次神推鬼撞跟朋友去看,感覺她應該是上了身,又或者林建岳拜過白龍王有神庇佑,千嬅係唱得意外的好,有幾下感覺仲唱得好過碟.很多舊歌,最鍾意應該同好多人一樣係"數你".朋友間講開,先發覺有些歌已是我初中回憶.千嬅今次既表演的確亮眼,刮目相看.抵睇.你好野.

Oct 13, 2007

好過C+的C+偵探

一向不喜歡看鬼片,俾錢,俾人嚇,唔化算.我膽唔大,返到屋企望鏡會以為有鬼,無為.彭氏兄弟既戲一向都無勇氣睇,除左成套青春片格局既"見鬼十一"."C+偵探"睇之前同事已經提醒過係一套不節不扣既鬼片,睇既時候無想像中咁恐怖,但都係好緊張.拍得緊湊,死人配樂好驚,驚過個畫面.讚.

Oct 7, 2007

色戒

全片最記憶猶新唔係梁朝偉同湯唯既性愛十八式.而係錢家樂被殺一幕.年輕人初次殺人既幼稚同荒唐,真係睇到個心都跳埋出黎.無覺得套戲特別好睇,有少少似斷背山,全世界都俾一百分,自己就係投入唔到.

舊去新來

酒醉.搭的士回家.瞓足全程.狼狽落車,行多兩步先發現隻耳插住個耳筒,部ipod就已經唔見左.唔明點解一大部ipod竟然可以跌左.神奇.朋友話ipod touch出左,價錢同當年ipod video面世時差唔多,所以就走左去買.用左個幾鐘入返二千幾首歌入去.16GB容量,唔見左13GB,地方唔係好見洗.用左一日,暫時感覺ok.除左間唔中個screen會sense唔到我隻手指公.下一步係要幫二千幾首歌搵返佢地個封套...十級難,但為左靚,值得.

Sep 15, 2007

停住空氣

街上一陣風都沒有.四周都好似多了一層霧.空氣污染指數高企,鼻敏感好辛苦.

家中閒來於Youtube發現一首男聲版Umbrella,分享一下: http://www.youtube.com/watch?v=5paQ9BwFAgI

Aug 22, 2007

人山人海

環保的課題談的久,貫徹實行卻從來沒有.事情是在發生的,氣候反常的嚴重性,無可選擇地每個人都感受得到.勸導世人要珍惜自己棲息地的,最近有綠色和平夥拍人山人海.演唱會中有很多地球受污染的數據跟資料,十居其九都是舊聞,普羅大眾對這些熟口熟面的警號都有一定認知,所以實不相瞞我是覺得個show有點悶的.明哥始終係主角,縱然黃家強亦成功踩場.at17的藍天與白雲令人耳目一新,最型我倒會揀麥田守望者.短期內都唔會去伊館睇show,d位的確好細,坐得的確好辛苦...琴晚我無開冷氣瞓,唔知幫唔幫到地球先生.